Mae Cymru Gyfoes / Wales Contemporary yn gystadleuaeth agored ryngwladol ar gyfer gwaith celf 2D a 3D mewn unrhyw gyfrwng ac eithrio ffilm a ffotograffiaeth, lle dyfernir chwe gwobr i gyfanswm o £12,000. Bwriad Cymru Gyfoes, a ddatblygwyd gan y Waterfront Gallery ar y cyd â Llywodraeth Cymru, yw dathlu pob agwedd ar y wlad drwy wahodd artistiaid i gyflwyno gwaith a ysbrydolir gan ei hanes hynafol, ei hanes celfyddydol, ei threftadaeth, ei thirwedd (gwledig, trefol neu wleidyddol) a’i diwylliant cyfoes.

Mae’r Waterfront Gallery yn Fenter Gymdeithasol ac yn Elusen Gofrestredig ac yn ystod y ddwy flynedd ddiwethaf mae wedi dod yn oriel wirioneddol ryngwladol drwy fenter ac arweinyddiaeth David Randell, ei churadur a’i chyfarwyddwr, yn sgil creu Cystadleuaeth Gelf Ryngwladol Cymru Gyfoes yn 2019.

Yn dilyn galwad am geisiadau a welodd mwy na 1100 o ddarnau celf yn cael eu cyflwyno o bob rhan o’r byd – gan gynnwys y DU a Gweriniaeth Iwerddon, Denmarc, Ffrainc, yr Almaen, Sbaen, yr Iseldiroedd, y Weriniaeth Tsiec, Rwmania, Cyprus, Japan, China, Rwsia, Hwngari, Moldova, Chile, Hong Kong, Singapore, Awstralia, UDA a Chanada i gyd wedi’u cynrychioli – dewiswyd 150 o ddarnau ar gyfer ail Arddangosfa Cymru Gyfoes yn y Waterfront Gallery yn Aberdaugleddau, Sir Benfro rhwng 13 Tachwedd a 30 Rhagfyr 2020, ac yn oriel OXO yn Llundain yng Ngwanwyn 2021.

Rydym yn ddiolchgar iawn i’r canlynol:

• Panel beirniadu 2020 am eu holl waith caled a’u hiwmor da wrth ddewis arddangosfa mor wych: yr artist Basil Beattie RA, yr arlunydd a’r athro emeritws Gerda Roper a’r cerflunydd Sebastian Boyesen.
• Ein noddwyr gwerthfawr Rob Thompson a Tessa Prior, Valero Petroleum, Awdurdod Porthladd Aberdaugleddau, George James, a’r Waterfront Gallery.
• Ein partneriaid, Parker Harris, Llundain, y mae eu cefnogaeth wych wedi helpu i wneud hyn yn bosibl.
• ‘Croeso Cymru’ am eu cyngor a’u cefnogaeth.
• Ein nifer fach ond cefnogol o wirfoddolwyr na fyddai hyn wedi bod yn bosibl hebddynt.

Mae’r prosiect hwn wedi derbyn cyllid trwy’r Gronfa Arloesi Cynnyrch Twristiaeth (TPIF) a gefnogir trwy Raglen Cymunedau Gwledig Llywodraeth Cymru – Rhaglen Datblygu Gwledig 2014 – 2020, a ariennir gan Gronfa Amaethyddol Ewrop ar gyfer Datblygu Gwledig (EAFRD) a Llywodraeth Cymru. Nod y Gronfa yw annog syniadau cynnyrch arloesol newydd drwy weithio mewn partneriaeth a fydd yn cael mwy o effaith ac yn denu mwy o ymwelwyr.

Mwy o wybodaeth